'చిరు' పార్టీ అభ్యర్ధిగా జర్నలిస్టు సంఘం నేత

ఏ పార్టీ అధికారంలోకి వచ్చినా అధికార పీఠం చుట్టూ ఆ జర్నలిస్టు నేతలే కనిపిస్తుంటారన్న సంగతి మన జర్నలిస్టు మిత్రులందరికీ బాగా తెలుసు. వాతావరణాన్ని ముందుగానే పసిగట్టి తగిన జాగ్రత్తలు తీసుకునే ' ఆ ఇద్దరు ' ఒకప్పుడు చంద్రబాబు చెంత చేరి చక్రం తిప్పిన వారే. ఇప్పుడు రాజశేఖర రెడ్డిని నమ్ముకొని ఆయనకు అండదండగా ఉన్నట్టు కనిపిస్తూ తరచు టీవీలలో కూడా ప్రభుత్వానికి అనుకూలంగా వాదిస్తూ తమ మనుగడకోసం నానా తంటాలు పడుతూ వచ్చారు.

ఇప్పుడు తాజాగా వాళ్ళకో అనుమానం వచ్చింది.నిజంగానే చిరు గాలి వీచి ఆయన గెలిస్తే తమ మనుగడ ఎలా ఉంటుందోనన్న అనుమానం వచ్చిందే తడవుగా ప్రణాళికలు సిద్ధం చేశారు. ఆంధ్ర ప్రదేశ్ వర్కింగ్ జర్నలిస్టుల సంఘం అధ్యక్షుడైన సోమసుందరాన్ని చిరు శిబిరంలోకి ప్రవేశపెడుతున్నారు. లోక్‌సత్తా నిర్వహించే పత్రికకు సంపాదకుడిగా ఉన్న సోమసుందరం ఏనాడూ తన కులాన్ని చెప్పుకోకపోయినా ఇప్పుడు అవసరం కొద్దీ ఆయన చేత చెప్పిస్తున్నారు. పశ్చిమ గోదావరి జిల్లాకు చెందిన సోమసుందరానికి, ఆయన కుటుంబీకులకు ఆ ప్రాంతంలో ఉన్న పలుకుబడిని, ఆయనకున్న సీపీఐ నేపధ్యాన్ని ఉపయోగించుకోవచ్చుననని ' మిత్రా' కు ఇప్పటికే ఊదరగొట్టటం ముగిసింది.

సోమసుందరం మీద ఎవరికీ అనుమానాలు ఉండకపోవచ్చునేమోగాని ఆయన వెంట ఉన్నట్టు కనిపిస్తూ ఆయనను నడిపించే చాణక్యులను మాత్రం అభినందించక తప్పదు. ఏ పార్టీ వచ్చినా వీళ్ళ స్థానాలు పదిలం అనే సంగతి అర్థమైంది కదూ !