జిల్లాల్లో సాక్షి టీవీ ప్రయోగం వికటిస్తుందా ?

జీతాల స్థాయి పెంచటంతో పాటు రిపోర్టర్ల ఎంపికలోనూ సాక్షి టీవీ సరికొత్త ప్రయోగాలు చేస్తోంది. ప్రధానమైన కేంద్రాలలో మాత్రమే ఇద్దరేసి రిపోర్టర్లను నియమించుకునే సంప్రదాయానికి భిన్నంగా ప్రతి జిల్లాలోనూ ఇద్దరు రిపోర్టర్లను నియమిస్తోంది. దీనివలన పని విభజన సౌలభ్యం ఉంటుందని యాజమాన్యం భావిస్తున్నట్టు కనిపిస్తోంది. స్పెషల్ స్టోరీల మీద వెళ్ళిన రిపోర్టర్ కు బాదరబందీ లేకుండా ఆ పనిలో నిమగ్నమయ్యేందుకు ఇది వీలు కల్పిస్తుంది. ఆకస్మికంగా ఏదైనా జరిగితే లైవ్ చేయగలిగే రిపోర్టర్ ఆ పని చూసుకుంటాడు.దీనివలన రిపోర్టర్ మీద ఒత్తిడి తగ్గి నాణ్యమైన వార్తలనిచ్చే వీలుంటుంది.
కానీ వాస్తవం ఇంత బాగా ఉంటుందా అన్నదే ప్రశ్న. జిల్లా రిపోర్టర్ ఆ జిల్లాలో రారాజులా ఉంటాడు. తన చానల్ కు సంబంధించినంతవరకు జిల్లాలో ఎవరైనా తననే సంప్రదించాలని ఆశిస్తాడు. తాను చేసే పనులు మరెవ్వరికీ తెలియకూడదనుకుంటాడు. కొన్నిచోట్ల కొంతమంది వాటాలు అందుకోవలసి వచ్చినా ఇబ్బందే. అందువలన ఇందులో ఇమిడి ఉన్న అధిపత్య సమస్యను సాక్షి యాజమాన్యం ఎలా పరిష్కరిస్తుందన్నదే అసలు సమస్య. ఇద్దరేసి రిపోర్టర్లు చేరినప్పటినుంచీ ఒకరిమీద మరొకరు ఫిర్యాదులు చేసుకోవటంతోనే కాలమంతా గడిచి పోతుంది. వాళ్ళను పర్యవేక్షించే వారు సైతం సగం కాలం ఫిర్యాదులమీద దర్యాప్తుకే ఖర్చు చేయాల్సి వస్తుంది.

సాక్షి సమస్యలను పక్కనబెడితే ఇప్పుడు జిల్లా రిపోర్టర్లు దొరక్క దాదాపుగా అన్ని చానల్స్ ఇబ్బందులు పడుతున్నాయి. కెమెరా ముందు మాట్లాడగలిగి ప్రత్యక్ష ప్రసారాలలో అనుభవం ఉన్న వాళ్ళనెవరినీ సాక్షి వదలటం లేదు. దాదాపుగా అన్ని చానల్స్ నుండి రిపోర్టర్లకు వలవేసి లాగుతున్నట్టు కనిపిస్తోంది. ఇప్పటివరకు వినిపిస్తున్న ఎంపికైనవారి పేర్లు పరిశీలిస్తే అందరూ ఏదో ఒక చానల్ లో పనిచేస్తున్నవారే. మరి ఆ ఖాళీలన్నీ ఎలా భర్తీ చేసుకుంటారో చూడాలి. ఈ సమస్య ఇంతటితో ఆగిపోదు. స్ట్రింగర్ల కోసం వెతుకులాట మొదలైతే ప్రింట్ నుంచి వలసలు కూడా ఎక్కువౌతాయి.