మళ్ళీ తెలుగులో న్యూస్ చానల్ ఆలోచనలో జీ మీడియా

ప్రాంతీయభాషల్లో పూర్తి స్థాయి న్యూస్ చానల్ కంటే న్యూస్ చానల్ ను, ఎంటర్టైన్మెంట్ చానల్ ను కలిపి అందించటం లాభదాయకమని భావించిన జీ మీడియా ఇప్పుడు తన నిర్ణయాన్ని మార్చుకుంది. రెండూ వేరు వేరుగా ఉండటమే మంచిదనే అభిప్రాయానికొచ్చింది. అదే సమయంలో గతంలో మూసేసిన తెలుగు న్యూస్ చానల్ ను మళ్ళీ ప్రారంభించే దిశలో ఆలోచిస్తున్నట్టు తెలిసింది.
రెండేళ్ళకిందట  అప్పటి సీఈవో అలోక్ అగర్వాల్ టెరెస్ట్రియల్ ఎంటర్టైన్మెంట్ నెట్ వర్క్ (టేణ్)  పేరుతో ఒక హైబ్రిడ్ నమూనాను ప్రవేశపెట్టిన సంగతి తెలిసిందే. జీ రాజస్థాన్, జీ పూర్వయా, జీ కళింగ పేర్లతో న్యూస్, ఎంటర్టైన్మెంట్ కలిపి చానల్స్ ప్రారంభించారు. అయితే, ఆ ప్రయోగం అంతగా ఫలించకపోవటంతో న్యూస్, ఎంటర్టైన్మెంట్ చానల్స్ విడివిడిగా ఉండటమే మంచిదనే అభిప్రాయానికొచ్చింది. అంటే, న్యూస్ చానల్ లో న్యూస్ తో బాటు ఇన్ఫొటైన్మెంట్ కార్యక్రమాలుంటాయి తప్ప ఎంటర్టైన్మెంట్ కార్యక్రమాలు మాత్రం ఉండవు.
జనరల్ ఎంటర్టైన్మెంట్ చానల్స్ తో సమానంగా బడ్జెట్ కేటాయించటం కుదరని పని కాబట్టి న్యూస్ చానల్స్ ను వాటి సహజ స్వరూపం దెబ్బతినకుండా పూర్తి స్థాయి న్యూస్ చానల్స్ గానే ఉంచాలని యాజమాన్యం నిర్ణయించిందని తెలుస్తోంది. ఫిక్షన్ స్థానంలో నాన్ ఫిక్షన్ కార్యక్రమాలు పెంచటం ద్వారా ఖర్చు తగ్గించి న్యూస్ చానల్ లో న్యూస్, ఇన్ఫొటైన్మెంట్ మాత్రమే అందేట్టు చూస్తారు.
ఇలా ఉండగా గతంలో తెలుగులో నడిపిన  జీ 24 గంటలు చానల్ ను పునరుద్ధరించాలని కూడా యాజమాన్యం నిర్ణయించింది. అయితే, ఏదైనా ఒక రాష్ట్రానికి పరిమితం కావాలా రెండు రాష్ట్రాలకూ కలిపి ఒకే చానల్ నడపాలా అనే విషయంలో ఇంకా ఒక నిర్ణయానికి రాలేదని తెలుస్తోంది. జీ తెలుగు జనరల్ ఎంటర్టైన్మెంట్ చానల్ లో న్యూస్ బులిటెన్లు నడపాలని కొద్దినెలలకిందట భావించినా, ఆ తరువాత ఆ ఆలోచనకు పూర్తిగా స్వస్తిపలికారు.

SOurce :- telugutv.info