న్యూస్ చానల్స్ కు సిబ్బంది కావలెను

కొత్తగా రాబోయే దిగువ పేర్కొన్న 24 గంటల న్యూస్ చానల్స్ కు సిబ్బంది కావలెను. జీతభత్యాల వివరాలు, అర్హతలు, దగ్గరి దారులు, సామాజిక వర్గ సమీకరణలు గమనించి దరఖాస్తు చేసుకోగలరు.

సాక్షి టీవీ : సాక్షి పత్రిక తరహాలో భారీగా రాబోతున్న ఈ చానల్ లో ఇప్పటికే చేరిన వారు ఎవరెవరు ఏ హోదాలో ఉన్నదీ స్పష్టంగా తెలియకపోయినప్పటికీ అన్ని స్థాయిలలో అవకాశాలున్నవి.50 నుంచి 150 శాతం వరకు ఎక్కువ జీతం ఇవ్వడానికి సిద్ధం. ఈటీవీ2, టీవీ9 సిబ్బందికి ప్రాధాన్యం. సాక్షి పత్రిక తరహాలో యాజమాన్యపు సామాజిక వర్గానికి ప్రాధాన్యం ఇవ్వడం లేదు.అయితే ఇదే అవకాశంగా భావించి మరో సామాజిక వర్గం విజృంభిస్తున్న మాట కొట్టిపారేయటానికి వీల్లేదు.

టీ టీవీ : అంతా నిజమే చెబుతామంటున్న టీ చానల్ భారీ జీతాలివ్వడానికి సిద్ధమవుతోందన్న మాట కూడా నిజం. వయసు, అనుభవం లాంటి విషయాలను కూడా పక్కనబెట్టి టీవీ జర్నలిస్టుల కంటే ప్రింట్ జర్నలిస్టులకు ప్రాధాన్యమిచ్చి బాగా ప్రోత్సహించాలనే సదుద్దేశంతో ఉంది. ఆంధ్ర జ్యోతిలో పనిచేసిన అనుభవం గాని, పనిచేస్తున్నవారి సిఫారసు గాని ఉంటే అదనపు అర్హత. తలుపు తట్టిన వారికి వెంటనే అవకాశం.
సీబీసీ న్యూస్ : పది నెలలుగా ప్రయత్నాలు చేస్తూ వస్తున్న ఈ చానల్ త్వరలో కొత్త భవనంలోకి మారిన వెంటనే భారీగా సిబ్బందిని తీసుకునేందుకు సిద్ధమవుతోంది.ఒక మోస్తరు జీతాలుంటాయి.ఈ నెల లాగా మరెప్పుడూ జీతాలు ఆలస్యం కావని కూడా గట్టిగా హామీ ఇస్తోంది.అన్ని చోట్లా ప్రయత్నించిన తరువాతనే ఇక్కడకు వస్తారన్న అపార నమ్మకం ఉంది. జర్నలిస్టులకు ఇంతకంటే భరోసా అవసరమా ?

సితార (న్యూస్) : ముందుగా ఐదారు బులిటెన్స్ తో మొదలైనప్పటికీ ఆ తరువాత 24 గంటల న్యూస్ చానల్ గా మారుతుంది గనుక త్వరపడాలని పిలుపునిస్తోంది. ఎందుకైనా మంచిదని ఏడాది కాంట్రాక్ట్ మీదనే ఉద్యోగాలు ఇస్తోంది.ఈ లోపు కన్సల్టెంట్లుగానే ఉద్యోగపత్రాలు అందుతాయి.కాకపోతే త్వరలో మీరంతా స్టార్ ఉద్యోగులవుతారనే ప్రచారం మాత్రం చేసుకుంటోంది.నమ్మితే నమ్మండి.

జీ తెలుగు న్యూస్ : కేంద్ర ప్రభుత్వ ఉద్యోగం లాంటిది. మంచి జీతం. ఏటా బోనస్. వారానికి ఐదే రోజులు పని. మీకు మీరుగా వెళ్తే తప్ప మిమ్మల్ని ఎవరూ చానల్ నుంచి బైటికి పంపే ప్రయత్నం చేయరు.ఇంకా రిక్రూట్ మెంట్ మొదలు కాలేదుగాని కాస్త పని తెలిసిన వాళ్ళందరూ ప్రయత్నించుకోవచ్చు. ఈటీవీ వారికి ప్రాధాన్యం.